Vel blåst årsmøte 2025
Felleskjøpet Rogaland Agder sitt årsmøte gjekk av stabelen på Scandic Stavanger Forus 25. mars.
Bånn gass: Året 2024 gav grunn til å smila for styreleiar Sveinung Svebestad og adm.dir. Per Harald Vabø. Nå er årsmøtet over og FKRA køyrer vidare inn i 2025 – med John Deere, så klart!
Gråvêr og lett regn gjorde at utsendingane til FKRA sitt øvste styringsorgan, leia av ordføraren i årsmøte, Audun Meland, ikkje trong tenka på våronna denne dagen. Men styret og administrasjonen noterte seg at fleire tok opp mangelen på ferdig oppsekka såfrø alt i mars, noko som vart teke ad nota.
Tradisjonen tru starta årsmøtet med styreleiarens tale. FKRA er ein god partner for bonden i Sørvest, og våre bønder er gode for FKRA, sa Sveinung Svebestad innleiingsvis. Han peika på at bøndene i FKRA sitt område er frampå og raske til å reagera når moglegheitene byr seg. For eksempel når marknaden etterspør meir mjølk, slik tilfellet var i fjor.
Raskt handlande bønder syner at i kraftfôrsalet, som auka betydeleg i 2024. Svebestad heldt også fram resultata i maskindivisjonen. I tillegg leverte blant andre Bondekompaniet-butikkane godt i fjor.
– Butikk har bidrege med ein stor del av resultatet i FKRA dei siste åra. Det er viktig at me klarer å halde oppe aktiviteten spesielt mot privatmarknaden, sa han.
FKRA blir påverka av alt som for tida skjer internasjonalt. Viktigare då er det i følgje styreleiaren å driva best mogleg innanfor dei rammene samvirkeverksemda sjølv kan påverka.
– Difor må me kvar dag gjera ein god jobb i alle våre butikkar og avdelingar, sa Svebestad, før han takka for innsatsen og gav honnør til dei tilsette.
Både styreleiar og administrerande direktør Per Harald Vabø brukte god tid til å informera om arbeidet med nytt ERP-system i selskapet.
– Eit heilt naudsynt skifte, men det vil dra med seg store kostnadar dei neste 2-3 åra, understreka Svebestad.
Orientering resultat og rekneskap
For selskapet auka omsetnaden med åtte prosent eller 265 millionar kroner i 2024. Administrerande direktør Per Harald Vabø orienterte grundig om drifta og gjekk gjennom dei ulike salsområda og stoda for dotterselskapa. Han brukte også tid til å forklara årsmøtet om utfordringane med internasjonal handel og svak kronekurs.
Både økonomidirektør Thomas Kvalevåg og Per Harald Vabø orienterte om det økonomiske resultatet. Driftsresultatet for konsernet enda på 161,5 millionar kroner mot 97,3 millionar i 2023. Konsernets årsresultat etter skatt vart 28,9 millionar mot 41,6 millionar i 2023. For morselskapet vart driftsresultatet 111 millionar kroner mot 92,1 millionar kroner i 2023. Årsresultatet etter skatt i morselskapet vart 71,7 millionar kroner mot 46,8 millionar kroner i 2023.
Kjøpsutbytte til medlemmer
Av resultatet etter skatt for FKRA på 71,7 millionar kroner blir 23 millionar kroner avsett til kjøpsutbytte til medlemmane, medan 48,7 millionar kroner blir avsett til annan eigenkapital. Kjøpsutbytte utgjer 1% og vart utrekna ihht. gjeldande reglar.
Årsmelding og rekneskap vart samrøystes vedteke.
Les årsmelding og rekneskap her
Generaldebatten
Det knyter seg alltid spaning til generaldebatten etter årsmelding, rekneskap og kontrollkomiteen sin rapport. Så også i år. Her var spørsmål om ensileringsmiddelet Kofasil og nye mjølkeerstatningar. Og såfrø. Fleire tok opp rolla til innkjøpslag og handelslag. Vidare ville årsmøteutsendingane vita meir om driftsstopp på garden og utrykking. Beredskap var tema – og årsmøtet ville vita meir om praksisen og framtida for GMO-frie råvarer. Og, ikkje minst; kva kan gjerast for å redusere fosforinnhaldet i kraftfôr og mineralgjødsel.
Bitte litt ris, men mest ros. Styremedlem Tarald Oma heldt fram at den største jobben som er gjort dei siste åra, er FKRA sitt arbeid i førekant av Gjødselbrukføreskrifta. Årsmøteutsending Magnar Fjeldheim minna om FKRA skal vera ein lønsam partnar.
– Hugs at me alltid kan bli enda betre, sa han.
Val
Det vart ingen skifte i styret. Sveinung Svebestad vart gjenvalt til styreleiar for eitt år, medan Roar Lima Grødeland og Kirsten V. Eikje fekk fornya tillit med to nye år i styret. Lima Grødeland held fram som nestleiar (eitt år). Fornya tillit fekk også ordføraren i årsmøtet, Audun Meland og varaordførar Inger Margrethe Eidesen.
Sjå også:
